ലൂസിഫറിന്റെ കളക്ഷനും ബിസിനസ്സും; ഒഫീഷ്യൽ റിപ്പോർട്ട് പുറത്തുവിട്ട് നിർമാതാവ് ആന്റണി പെരുമ്പാവൂർ..!!

മലയാള സിനിമയിലെ ഏറ്റവും വലിയ വിജയമായി മാറിയ ചിത്രമാണ് പൃഥ്വിരാജ് ആദ്യമായി സംവിധാനം ചെയ്ത് മോഹൻലാൽ, മഞ്ജു വാര്യർ, ടോവിനോ തോമസ്സ് വിവേക് ഒബ്രോയി, ഇന്ദ്രജിത്, പൃഥ്വിരാജ് എന്നിവർ പ്രധാന വേഷത്തിൽ എത്തിയ ലൂസിഫർ.

ഇതുവരെ പുലിമുരുകൻ നേടിയിരുന്ന 150 കോടിയുടെ റെക്കോര്ഡ് കളക്ഷൻ ആണ് ലൂസിഫർ മറികടന്നത്. ആശിർവാദ് സിനിമാസിന്റെ ബാനറിൽ ആന്റണി പെരുമ്പാവൂർ നിർമ്മിച്ച ചിത്രം സംവിധാനം ചെയ്തത് പൃഥ്വിരാജ് സുകുമാരൻ ആയിരുന്നു. മുരളി ഗോപി ആയിരുന്നു തിരക്കഥ.

മലയാള സിനിമയിലെ തന്നെ വലിയ ബഡ്ജറ്റിൽ ഒരുങ്ങിയ ചിത്രം, 75 കോടിയോളം ബഡ്ജറ്റിലാണ് നിർമ്മിച്ചത്. ആഗോള വ്യാപകമായി നേടിയെടുത്തത് 175 കോടിയോളം രൂപ ആണ്. 13 കോടി രൂപക്ക് മുകളിൽ ഓൾ ടൈം റെക്കോർഡ് തുക ആമസോൺ പ്രൈം റൈറ്റ്സ് ആയി നേടിയ ഈ ചിത്രം 6 കോടി രൂപ സാറ്റലൈറ്റ് റൈറ്റ്സ് ആയും നേടി. 10 കോടി രൂപയ്ക്കു മുകളിൽ ആണ് ഈ ചിത്രത്തിന്റെ തമിഴ്, തെലുഗ്, കന്നഡ, ഹിന്ദി റൈറ്റുകൾ വിറ്റു പോയത്. അങ്ങനെ ആകെ മൊത്തം 204 കോടിയോളം രൂപയാണ് ഈ ചിത്രം നടത്തിയ ടോട്ടൽ ബിസിനസ്സ്. മലയാളത്തിന് ആദ്യ നൂറു കോടി ക്ലബ് സമ്മാനിച്ച മോഹൻലാൽ തന്നെ മലയാളത്തിന് ആദ്യ 200 കോടിയും സമ്മാനിച്ചു. ടോട്ടൽ ബിസിനസ്സ് കൂടി ചേർത്ത് നൂറു കോടി ക്ലബ്ബിൽ എത്തിയ ചിത്രങ്ങൾ കൂടി നോക്കിയാൽ മലയാളത്തിൽ ആകെ ഉള്ള അഞ്ചു ചിത്രങ്ങളിൽ മൂന്നെണ്ണത്തിലും മോഹൻലാൽ ആണ് നായകൻ.